*
No brolo per me fiolo
fondo de la realta'
'ntra gialli de vaiolo
muri, for de cita' -
i bandoni col stema,
cranio de bove a gesso,
segno fato patema
a mentova' l'istesso.
Oemme in mezo ai schiopi
de la carburazio'
dietro le foie dei piopi
scarince (pel strado'
frate in cima a le bande
d'immacolati corni
drento a 'n fortore grande
de piscio a lumi alborni).
Passagio de stretoia
pel marchio e per la pesa
de soto 'na tetoia
da carena in discesa,
e tuto in compimento
usuale de strage.
El sangue sul cemento,
fume suspeso in brage.
**
In mezo campo arato
el nudo matatoio
(come p'un desolato
mare punta de scoio)
da glossa de lunario
arvisto ricorente
in bordo a calendario,
ciarma de le turmente.
A l'ora de lo sbando
per fato ocasionale
d'indove come e quando,
el vitelo e' virtuale.
Pei loghi de suplizio
da le boteghe care
andati (e in benefizio
le poghe robe spare)
abrevi streti in ghiomo
de storia e alegoria
- omo imbrancato, omo
piombato in ferovia
fino a piazale breve
eterno (stazio' finte,
i merci su la neve
spariti sbufi e spinte).
***
Tuta t'ha traversata
stanote, via de morte,
vita, la bandonata
de vechio ombra de sorte
con el glu glu de gola
da verso de picioni
- aborti de parola
'ntra sordi cornicioni,
e l'aria trasmeteva
lumi come cerase
a la sua angoscia abreva
'nt'un tramesta' de case
(forme de l'esistenza
comune, dolce modo,
sgramate a la violenza
come intonaco a chiodo).
La primordiale tara
de vive: sorti' al niente,
pesci per la bogara
sul fil de la corente,
omini soto al giallo
astro de l'agonia
spinti da dietro al vallo
dei persi - in atonia.
